Osakidetzako erizain baten heriotzaren aurrean, langileen segurtasuna eta osasuna babesteko eskatu dute sindikatuek

Coronabirusaren ondorioz Osakidetzako erizain bat hil delako berri tristearen aurrean, LAB, SATSE, ELA, SME, CCOO, UGT, ESK, SAE eta UTESE sindikatuok zorigaiztoko gertaera honengatik gure tristura sakona adierazi nahi dugu eta gure doluminak helarazi familiari, hurbilekoei eta lankideei. Elkartasuna adierazteko eta Osakidetzari berehalako neurriak har ditzala eskatzeko, datozen bi egunetan krespoi beltz bat eramateko eta leihoetatik trapu beltzak zintzilikatzeko eskatzen diegu langileei. Halaber, dei egiten diegu langileei bihar, ostirala, 12etan, jarduera eten eta 5 minutuko isilunea egin dezaten hildako lankidearengatik.

Krisi hau hasi zenetik, behin eta berriz esan dugu laneko segurtasunak eta osasunak bateragarriak izan behar dutela lanarekin eta baita herritarrei funtsezko zerbitzu baten eskaintzarekin. Osakidetzaren ardura da hori bermatzea, baita koronabirusaren izurritearekin ere. Eta Osakidetza da, halaber, langileei prestakuntza eta informazio nahikoa eman behar diena.

Horregatik, eta zalantzarik gabe, hildako pertsonaren lan-jardueraren ondorioz gertatu izan den zorigaiztoko gertaera honen aurrean, berriro adierazi nahi dugu ezinbestekoa dela Osakidetzak norbera babesteko ekipamenduen eta plantillaren segurtasuna eta osasuna babesteko beharrezkoak izan daitezkeen gainerako materialen hornidura bermatzea.

Hori horrela izan dadin ahalbidetuko duen plan bat arikulatu behar dute Eusko Jaurlaritzak eta Osakidetzak berak. Ezin dugu hornidurarik gabeko eszenatoki bat onartu. Hori dela eta, plan bat egon behar du behar diren materialen disponibilidadea bermatzeko.

Plantillaren segurtasuna eta osasuna bermatu behar dira, une honetan hain beharrezkoa den osasun-arreta ere eman daitekeela bermatzeko. Eusko Jaurlaritzari eta Osakidetzari berehala jarduteko exijitzen diegu. Ahalegin guztiak nahitaez funtzionatzen jarraitu behar duten funtsezko zerbitzuetan segurtasuna bermatzera bideratu behar dira.

Sareetara

Utzi erantzuna

Zure e-posta helbidea ez da argitaratuko. Beharrezko eremuak * markatuta daude