Erabakia COVID-19aren krisiak sortutako osasun arriskuaren ondorioz hartu da I Balizko alternatibak aztertu ondoren, bertan behera utzi da ikusleen eta konpainien segurtasuna bermatzeko I Azoka egiteko aztertutako balizko alternatibak “ez dira bideragarriak egungo baldintzetan”, dio Udalak
Leioako Udalak , maiatzaren 14tik 17ra egin behar zen Umore Azokaren , Kaleko Artisten Azokaren, XXI. edizioa bertan behera uztea erabaki du, COVID-19aren hedapenak sortutako osasun arrisku egoera dela eta. Erantzukizunak eta pertsonen, ikus-entzuleen eta profesionalen, segurtasunak eragin dute erabaki hori.
“Erabaki gogorra da, asko kostatu zaigu hartzea, eta bide guztietatik saihesten ahalegindu garen arren, egungo egoerak ez digu beste aukerarik utzi. (…) Beste ezeren gainetik pertsonen segurtasuna dago”, adierazi du Iban Rodríguez alkateak.
Hogei edizio jarraian egin ondoren, ekitaldi honen historian bertan behera utzi behar izan den lehen aldia da. “Aztertu ditugun aukera posible guztien artean, hau gogorrena baina errealena da. Jasaten ari garen pandemiaren eta ondorengo eraginen aurreko zalantzak ikusita, ezinezkoa da aurreko edizioetako bermeekin eta eraginkortasunarekin egitea” adierazi dute Umore Azokaren antolakuntzatik.
Udaleko Kultura Sailak gogorarazi duenez, martxoaren erdialdetik indarrean dauden neurriek aurretik ere eragina izan dute konpainien mugikortasunean eta prestakuntza lanetan. “25 estreinaldi zeuden aurreikusita, eta konpainiek zailtasun handiak izan dituzte euren sorkuntza lan berriak aurkezteko. Gainera, horietako askok behar logistikoak zituzten, estrukturak, eszenografiak, entseguak, etab., eta une honetan horiek guztiak kudeatzea oso zaila zen jadanik”.
Abagune horiei guztiei, ekitaldiaren antolakuntzarentzat oinarrizkoak diren zenbait zerbitzuren egoera nahasia gehitu behar zaio, ostatuak, jatetxeak, estrukturak… Horiek guztiak ezinbestekoak dira azokak behar bezala funtzionatzeko, eta une honetan ez dira erabilgarriak.
Egoera horren aurrean, Udalak esker ona erakutsi gura izan die Umore Azokako taldeari eta inplikatutako Kaleko Arte Konpainia guztiei, “udalerriaren bizitza kulturalean eta arte eszenikoetan erreferente gisa finkatu den ekimena aurrera eramaten saiatzeko egindako lan handiarengatik”. Halaber, “benetan sentitzen du egungo egoera modu berezian jasaten ari den sektorean, Kaleko Arteetan, erabaki horrek eragin dezakeen kaltea”, baina argi eta garbi adierazi nahi izan du Umore Azokaren etorkizunarekin duen konpromisoa: “Kalean egiten den antzerkiaren oihalak altxatuko ditugu, are eta ilusio handiagoarekin, artistekin gozatzeko, eta berriro elkartuko gara … Umore Azoka Leioa –XXI – 2021ean–”.
