Zer berri? :: "Kolpatu topatu", Ezpalak taldearen bigarren diskoa

Ezpalak-ek, Zestoako rock alternatiboko taldeak, Kolpatu Topatu bigarren diskoa kaleratu berri du. Eñaut Gaztañagak ekoiztu du, zeinak Izaro, Olatz Salvador eta Dupla bezalako artistentzat egin duen lan, Grises musika taldeko kidea izateaz gain. Ezpalaken, ordea, gitarra jotzen du eta Juanjo Berasain (ahotsa), Unai Eizagirre (baxua) eta Janardana Iglesias (bateria) lagun dituela, lan berri bat sinatu dute. 2019an argitaratutako debutaren lorpen asko gordetzen ditu abesti bildumak eta soinu guztiz pertsonal bat osatu duten elementu berriak ere erakusten dizkigu.

Diskoko zortzi abestiek laurogeita hamargarren hamarkadako influentziak partekatzen dituzte debutarekin, Sonic Youth, Dinosaur Jr. edo Nirvana bezalako taldeak erreferentzia gisa hartuta. Hala ere, Kolpatu Topatuko erritmoak askoz ere rockeroagoak eta dantzagarriagoak dira, Idles edo Fontaines DC bezalako proposamen berritzaileen harira. Iazko azken txanpan gozatu ahal izan genituen Itzala eta Hegan edo hilik ereserkiak, eta Zatoz eta Banpiroak bezalako abesti berriek aulkitik altxatzera behartuko gaituzte.

Ezpalakek debuteko diskoarekin euskal musika alternatiboaren erreferentzia bihurtzea lortu bazuen, bigarren atal honek Euskal Herriko mugetatik haratago eramango ditu. Beraiek dioten bezala: “hegoak moztea ordea edo hiltzea berdina da”.

**Ezpalak, Zestoako musika taldea I Argazkia: Oso polita**

Laburrean

Izenburua Kolpatu Topatu

Egileak Ezpalak

Diskoetxea Oso Polita

Zenbatekoa 16,95 € (biniloa) / 11,95 € (CD)

Formatua Biniloa / CD / MP3

Hizkuntza Euskara

Argitalpen-urtea 2021

Lizentzia Copyright

Abestiak

1. Hegan edo hilik (3:02)
2. Itzala (3:23)
3. Zatoz (3:42)
4. Tristura (3:10)
5. Banpiroak (3:42)
6. Denbora (3:06)
7. Hauxe naiz ni (3:43)
8. Bapatean (3:17)