Adinekoei eta arrisku taldeetako pertsonei maskarak doan banatzea eskatu du EH Bilduk

Adinekoei eta arrisku taldeetako pertsonei maskarak doan banatzea eskatu du EH Bilduk

Maskaren doako banaketa errazteko, medikamentuen errezeten sistema berdina erabiltzea proposatu dio EH Bilduk Lakuako Gobernuko Osasun sailari.

65 urtetik gorako pertsonei zein arrisku taldeetakoak diren gainontzeko herritar guztiei maskarak doan banatzea proposatu dio EH Bilduk Lakuako Gobernuko Osasun sailari. Rebeka Ubera talde subiranistako legebiltzarkideak Nekane Murga Lakuako Osasun sailburuari egin dio eskaera, asteazkenen goizean Murgak alderdietako ordezkariekin izan duen bileran.

Bilera horretan, EH Bilduko legebiltzarkideak gogorarazi du Estatu espainiarreko zenbait erkidegotan 65 urtetik gorakoei eta arrisku taldeetako pertsonei maskarak doan banatzea erabaki dutela, eta Euskal Herrian ere «funtsezkoa» dela pertsona horiei maskarak eskuratzeko bidea «erraztea».

Azaldu duenez, Osasun sailak medikamentuen errezetekin erabiltzen duen sistema bera baliatu dezake maskarak banatzeko, farmaziekin elkarlanean.

Koronabirusaren hedapena murrizteko maskara erabiltzea sarritan gomendatu dute osasun arloko adituek, eta zenbait kasutan, garraio publikoan edo zenbait lanbidetan esaterako, derrigorrez erabili behar da.

«Covid-19ari aurre egiterakoan, eta are gehiago behin konfinamendutik aterata, maskara horiek ahalbidetzen dituzten neurri higienikoak funtsezkoak baitira kutsatze maila kontrolpean mantentzeko», arrazoitu du Uberak. Modu berean, arrisku taldeetako pertsonei «lehentasuna» emateak «berebiziko» garrantzia duela azpimarratu du.

Sareetara

Utzi erantzuna

Zure e-posta helbidea ez da argitaratuko. Beharrezko eremuak * markatuta daude