Gaur, Hamaika Gara ekimenaren barruan, euskararen gaineko solasaldia

Hamaika Gara Solasaldiak ekimenaren barruan, Hizkuntza eta politika, normalizazioa helburu izeneko mahai-ingurua antolatu du Gure Eskuk, Berria eta Hamaika Telebistarekin elkarlanean.

Solasaldia Ane Zuazuabizkar kazetariak gidatuko du, eta bertan burujabetza gabeziak hizkuntzaren normalizazioan duen eragina aztertuko da. Era berean, euskararen ikuspuntutik, zertarako behar dugun burujabetza eta, alderantziz, euskalgintzak burujabetza prozesuari zein ekarpen egin diezaiokeen mintzagai izango da.

Gaia udal mailako, zuzenbideko eta kulturgintzako ikuspuntuetatik aztertuko da. Horren inguruan Paul Bilbao Euskalgintzaren Kontseiluaren Idazkari Nagusia, Garbiñe Ubeda, Euskal Idazleen Elkarteko Lehendakaria, Miren Segurola, UEMAko Koordinatzailea eta Eneritz Zabaleta, Zuzenbidean Doktorea arituko dira.

Aurreko saioan, jaioberri den Naziometroaz jardun zuten Arkaitz Fullaondok, Telesforo Monzon eLAB eta EHUko Parte Hartuz ikerketa taldearen lehen Nazioametroaren ondorioak laburki azalduz eta, ondoren, Zelai Nikolas Gure Eskuko zuzendaritzako kideak Xabier Barandiaran EBBko kidearen, Floren Aoiz Iratzar Fundazioko buruaren eta Roberto Uriarte Unidas Podemoseko diputatuaren arteko solasaldia gidatu zuen.