Errusiar literaturatik japonierara egiten dute salto hilabete honetan irakurle klubeko bidaideek. Haruki Murakami idazle entzutetsua aukeratu dute oraingoan bidaia horretarako eta euskaraz bera irakurtzeko dagoen aukera bakarra (laginen bat kenduta) harrapatu dute.
Izenburua Curtis Fullerren abesti batetik hartzen duen eta gau bakar batean laburbiltzen den istorio honek Murakamiren unibertsorako sarbide ‘errazena’ bezala aipatu izan da sarritan (David Tejera Expósitok, adibidez [gazt]). Irakurlekideen kontu geratuko da, beraz, eleberri hau eskultura ala gehiegi aztertuz desegiten den elur-maluta ote den (Daniel Trillingek dioenez [ing]).
Haruki Murakami Kyoton jaio zen 1949an. Lehen eleberriarekin lortu zuen arrakastaren ondoren, emaztearekin batera gobernatzen zuen jazzbarra saldu eta idaztea bihurtu zuen ogibide. Norvegiar basoak eleberriaren ondoren -soilik Japonian 4 milioi ale saldu zituen-, mundu zabaleko hizkuntzetara egin zuen salto. Gaur egun, Murakami da japoniar idazlerik ezagunena.
Irakurle klubaren bilerak hilabete bakoitzeko hirugarren asteazkenean ospatzen dira, liburutegiko helduen solairuko erakusmahaiaren ondoko besaulkietan arratsaldeko sei t’erdietan (18:30). Liburua irakurri ez baina interesik izanez gero, han aurkituko ditu klubeko lagunak bihar, urtarrilak 16 dituenean.
+Info
Zer Irakurle Kluba
Izenburua Gauaren sakonean
Idazlea Haruki Murakami
Hizkuntza Euskara
Non Udal Liburutegiaren 3. solairuan
Eguna Urtarrilaren 16an
Ordua 18:30ean
Sarrera Doan
Bileran erabil ditzakegun apunteak (pdf)
Liburuaren inguruko kritikak Armiarma webgunean