Leioako Kaleko Artisten Azokaren XXI. edizioan Euskal Herriko 22 konpainiak, Estatuko 14k eta estatutik kanpoko 3k hartuko dute parte
Leioako Udalak antolatutako Kaleko Artisten Azokak, iaz osasun krisia dela eta utzitako herriko espazioa berreskuratuko du, eta bere kaleak ikuskizun onenekin beteko ditu. Ekitaldia irailaren 16tik 19ra bitartean izango da, eta 39 konpainiaren lanak ezagutzeko aukera emango du.
“Umore Azokarentzat fantasiaren, umorearen, ilusioaren, sorkuntzaren, magiaren eta gozamenaren urtea da hau. Iaz ezin izan genuen ospatu eta 2021ean indar handiagoz itzuliko ginela esan genuen, eta horrela egingo dugu”, esan du Iban Rodriguez Etxeberria Leioako alkateak. “Beharrezko neurri guztiak hartuko ditugu azoka egin ahal izateko, Leioak eta kulturak merezi dutelako”.
Programa artistikoan 39 konpainiak parte hartuko dute, horietatik 22 Euskal Herrikoak, 14 Estatukoak eta 3 estatutik kanpokoak, Belgikatik, Portugaletik eta Ukrainatik etorritakoak. Estatuko konpainien kasuan, Kataluniakoak nabarmentzen dira, Tarregako Firarekin, nazioarteko hitzordu ospetsuenetako batekin, egiten den NOMADAK programari esker.
Antzerkia, zirkua, dantza eta umorea izango dira gai nagusiak, baina baita piroteknia eta dantza bertikala ere, besteak beste. Ia emanaldi guztiak udalerriko erdiguneko hainbat puntutan instalatuko diren karpa azpian egingo dira; horrela, edukieren kontrola eta ikuskizunen ospakizuna bermatuko dira, baita eguraldi txarra dagoenean ere.
Horrez gain, Kultura Sailak hainbat jarduera paralelo antolatu ditu, Kaleko Arteei buruzko liburu baten aurkezpena edo “pandemia ondorengo” sektorearen egoerari buruzko hitzaldiak eta lan-mahaiak, besteak beste. Horrekin guztiarekin batera, azokaren esparru profesionalean lan handia egin da, eta Umore Azoka Leioa sektoreko oinarrizko erreferentzia bihurtu da. Ildo horretan, Estatuko eta Europako hainbat lekutako kultur programazio arduradunak egotea aurreikusten da, Portugalen aipamen nabarmenarekin.
“Kaleko arteen sektoreak asko sufritu du pandemia hau, eta Umore Azoka Leioa ez dago errealitate horretatik kanpo. Baina kultura eta kaleko arteak maite dituen hiria da, eta gure konpromisoa lehen egunean bezain sendoa da”, gogorarazi dute antolatzaileek. “Horregatik, 2021ean benetako Umore Azoka Leioa egingo dugu, bizi dugun egoerara egokituta, baina artistak kalean direla, jendeak lehen bezala ikusi eta senti ditzan. Normaltasuna berreskuratzeko bidean jarriko dugun gure aletxoa izango da”.
