Atzo amaitu zen Sarek antolatutako bizikleta itzulia. 169Km egin dituzte guztira Garesen hasi eta Donostiaraino egindako hiru etapak batuz.
Hiru egun hauetan zehar, euskal preso eta iheslarien etxerako bidea izan dute hizpide. “Pedalkada bakoitzarekin, igarotako bide bakoitzarekin, etxerako bideari eman diogu bultzada. Demostratua baitago, egiten den ekintza eta ekimen txiki bakoitzarekin aldaketa bultzatzen ari garela, aurrera egiten goazela, murruak eta blokeoak eraisten gabiltzala, bide berriak zabaltzen ari garela”. adierazi zuten antolatzaileek amaierako ekitaldian.
Sareren iritziz, azken hilabeteetan espetxe politikari dagokionean eman diren aldaketek, etapa berri bat zabaltzeko unea dela erakutsi dute. “Urteetan ezarritako salbuespen legediaren oinarri nagusi izan den urruntze politika bere amaierara iristen hasia da”.
Sareren bozeramileek esan zuenez, “oraindik, euskalherriratzeak urriak badira ere, ematen ari diren gerturatzeak orain artean itxia zen bidea zabaldu dute eta guk bide hori amaieraraino egin dadin urratsak eman behar ditugu”. Orain arte egindakoaren emaitza, Madrildik hegoaldera, urrunketaren alde ilunena izan diren espetxeak euskal herritarrez hustu daitezen lortzea izan dela azaldu dute.
Hori horrela, hurrengo fasean dute begirada jarrita Saren. “Orain salbuespen legedia atzean utzi eta legedi arrunterako bidea egi bilakatu behar dugu, euskal presoek etxerako bidea egin dezaten”.
Gaineratu dutenez, fase berrirako helburuak honako hauek dira:
• Preso guztiak Euskal Herriko espetxeetara ekartzea.
• Preso guztiei gradu progresiorako bidea ahalbidetzea eta bereziki zigorraren 3/4ak bete dituztenei 3.gradua ezartzea.
• Larriki gaixo diren eta 70 urtetik gorakoak diren presoen etxeratzea.
• 7/2003 Lege Organikoaren baita zigortutako presoei legedi arrunta ezartzea.
• Zigorren batuketa egitea, aurrez betetako zigorrak birritan betearaztea ekidinez.
Sarek norabide horretan pedalak astintzen, urratsak ematen eta kaleak betetzen jarraitzeko dei egin zuen. Sare herritarrean “euskal presoen etxerako bidea ahalbidetu eta elkarbizitzan eta bakean oinarritutako jendarte baten alde lanean jarraituko dugu”.
Info +
Joseba Azkarragaren hitzartzea Donostiako bukaera ekitaldian